Қуандық Бишімбаевтың бұрынғы әйелі Instagram-дағы парақшасында сотталушының туыс інісі Бақытжан Байжановтың телефонын тексеру кезінде табылған «өсиетке» қатысты ойын айтты.

Сотта екінші сотталушы Бақытжан Байжановтың телефоны зерделенген. Телефондағы видеолардың бірінде «өсиет» деп жазылған. Прокурор телефоннан Байжанов «Бишімбаевтың өсиеті» деп атаған видеоны тапты.

Жазба қосылған сәтте кадрдағы Бишімбаевтың дауысына ұқсас ер адам: «Барлық есепшотымды, байлығымды балаларыма арнаймын, сыйлаймын. Назым (Бишімбаевтың бұрынғы әйелі) мен менің балаларыма – Мансұрға, Кәрімге және Ранияға» дейді.

Бұл өсиетке қатысты Бишімбаевтың экс-әйелі Назым Қаһарман пікір білдірді.

«Сөз, сөз, сөз. Әрекет маңызды! Жалпы адам баласы әрекетімен мойындалуы керек деп есептеймін, ал ауызбен әр нәрсені айта беруге болады», - деп жазды ол.

САЛТАНАТ НҮКЕНОВАНЫҢ ҚАЗАСЫ

2023 жылдың 9 қарашасында Астана мейрамханаларының бірінде қайғылы жағдай болып, бұрынғы ұлттық экономика министрі Қуандық Бишімбаевтың әйелі Салтанат Нүкенова қайтыс болды. Сол оқиғадан кейін Бишімбаев қамауға алынды. Артынша оның туысы Бақытжан Байжанов та қамалды. 

Сот басталған кезде сотталушы Бишімбаев өзіне тағылған айыпты мойындамады. Экс-министрдің соттағы жауабын мына жерден оқуға болады.

Бишімбаевтың айтуынша, Салтанат Нүкенова және оның құрбысы үшінеуі «Қазақстан» орталық концерт залына концертке барған. Сол жерде екеуінің арасында жанжал шығып, концерт аяқталмастан шығып кеткен. Артынша BAU мейрамханасына келіп, бірнеше сағат бойы әңгімелескен.

8 сәуірде Астана қаласы көшпелі бригада дәрігері Нұрлан Мұхамбеденов сот залына келіп, тараптардың сұрағына жауап берді.

9 сәуірдегі сот отырысына қылмыстық іс бойынша куәгер Данияр Мейірбеков қатысты. Сол күні Салтанат Нүкенованың мәйітіне сараптама жүргізген сот-медициналық сарапшы Тахир Халимназаров қатысты. Сарапшы манекеннің басына қызыл және көк түсті қаламмен бірнеше жарақаттың орнын салып көрсетті.

10 сәуірдегі сот отырысында қылмыстық іс бойынша куәгер Аида Ахмедина қатысты. Прокурор Айжан Аймағанова сот барысында Ахмедина мен марқұм Салтанат Нүкенованың бір-біріне жазған хаттарын оқыды. Содан кейін іс бойынша куәгерлерден жауап алу аяқталды.

11 сәуірдегі сот отырысында Қуандық Бишімбаевтың адвокаты Ерлан Ғазымжанов судья Айжан Құлжанованы ауыстыруды сұрады. Алайда судья істі қарауды жалғастырды. Сол күні 11 сәуірде айыпталушы Бақытжан Байжановтан жауап алынды. Ол сот барысында өзінің туысы Қуандық Бишімбаев тарапынан қысым көріп жатқанын жеткізді.