Астананың бірқатар университетінде студенттерге V Дүниежүзілік көшпенділер ойындарының волонтерлік бағдарламасы таныстырылды, деп хабарлады Туризм және спорт министрлігі.

Жиындарда Дүниежүзілік көшпенділер ойындарын дайындау және өткізу жөніндегі дирекция басшылығы волонтерлердің осы ойындарға үлес қосуға мүмкіндігі бар екенін, еріктілер қызметінің тәжірибе жинаудағы жұмысының маңыздылығын айтты. Сонымен қатар волонтерлерге қойылатын талап, ереже, іріктеу кезеңдері туралы мәлімет жан-жақты түсіндірілді.

Жастардың еріктілер жасағы – спорттық және мәдени шаралардың маңызды бөлігі. Мейманды қарсы алу, оларға жол көрсетіп, бағыт сілтеу, шетелдіктерге аудармашы болу сияқты көзге көрінбейтін істің бәрінде волонтер жүреді. Былайша айтқанда, ерікті дегеніміз – өзара риясыз көмек пен патриотизмнің, қоғамға және елге пайдалы адам болудың жарқын үлгісі. Дерек үшін айтсақ, EXPO-2017 көрмесіне 7 мыңнан астам ерікті қатысты. Қысқы Азия ойындарында да жас өрендеріміз волонтер ретінде белсенділік танытты, – делінген министрліктің хабарламасында.

V Дүниежүзілік көшпенділер ойындарына волонтер болуға ниет білдірушілер https://worldnomadgames.kz/ сайты арқылы «Ерікті бол» бөліміне кіріп, сауалнаманы толтыруы керек. Барлық талаптан сүрінбей өткен үміткер сұхбатқа шақырылады. Волонтер жұмысына 18 жастан асқан үміткер таңдалады.

Қосымша Instagram, Tik Tok әлеуметтік желілерінде @Volunteer_nomadgameskz парақшаларында көрсетілген. Сондай-ақ WhatsApp, Telegram-да 8 701 841 20 24 байланыс нөмірі арқылы сұрақтарыңызды жолдай аласыздар, – делінген хабарламада.

Еске сала кетсек, Көшпенділер ойындары биыл Астанада 8-15 қыркүйек аралығында өтеді.

Онда спорттың 20 түрінен жарыстар ұйымдастырылады. Оған әлемнің 100-ден аса елінен 4 мыңға жуық өкіл қатысады.

«Қазанат» ипподромында және этноауыл аумағында ат жарысы, дәстүрлі садақ ату және құстармен аң аулау жарыстары, Жақсылық Үшкемпіров атындағы жекпе-жек сарайы мен «Алау» мұз айдыны сарайында ұлттық күрес түрлері мен халық ойындары бойынша жарыстар, «Думан» кешенінде дәстүрлі зияткерлік ойындар болады.