3 ақпанда Солтүстік Қазақстан облысы полиция департаментінің қызметкерлері «Тиолайн» компаниясы иелерінің бірі Виктор Долгалевті жер қойнауын рұқсатсыз пайдаланғаны үшін ұстады, деп хабарлады Halyq Uni тілшісі.

Агенттіктің мәліметінше, сот санкциясымен аталған азамат қамауға алынды. Қылмыстық іс одан әрі тергеу үшін ҚМА-ның Солтүстік Қазақстан облысы бойынша департаментіне жіберілді.

Сондай-ақ В.Долгалевке қатысты аса ірі көлемде кіріс алу арқылы заңсыз кәсіпкерлікпен айналысқаны үшін тергеу жүргізіліп жатыр. Тергеу мәліметтері бойынша, 2021 жылдың наурызында Индустрия және инфрақұрылымдық даму министрлігі компанияның 38 млрд теңгеге қаржылық және инвестициялық міндеттемелерін орындамауына байланысты «Обуховское» кен орнында жер қойнауын пайдалану бойынша келісімшартты мерзімінен бұрын тоқтатқан. Жоғарғы сот құзіретті органның іс-қимылдарының заңдылығын растады. Сонымен қатар, 2020 жылдың 1 маусымында сот шешімімен В.Долгалевке «Тиолайн» компаниясының мүлкін басқаруға тыйым салынды. Осыған қарамастан, В.Долгалев өзінің бақылауындағы құрылымдар арқылы заңсыз тау-кен өндірісін жалғастырып, Қытайға және басқа елдерге сұр схемалар бойынша экспорттаған. Тек үш жыл ішінде (2021-2023 жж.) 113 мың тоннаға жуық кен экспортталды, – деді ҚМА ресми өкілі Әлібек Әбділов.

Маманның қорытындысы бойынша, қылмыстық табыстың жалпы сомасы 26 млрд теңгеден асты. Бұл қаражатқа еншілес тұлғалар арқылы кен орнына іргелес жатқан 7,5 мыңға жуық гектар ауыл шаруашылығы мақсатындағы жерлер сатып алынып, ол жерде де заңсыз кен өндіру жүргізілген. Сонымен қатар, 2 млрд теңге бюджетке төленетін салықтар мен төлемдерден жалтару фактілері анықталды.

Қазір жасалған қылмыстың барлық мән-жайын анықтауға бағытталған тергеу әрекеттері жүргізіліп жатыр.

ҚР ҚПК-нің 201-бабы тәртібіндегі өзге ақпарат жария етуге жатпайды.