Мемлекет басшысы Қасым-Жомарт Тоқаев белгілі экономист, қоғам қайраткері Оразалы Сәбденмен кездесті.

Кездесуде еліміздің экономикалық даму перспективалары жан-жақты талқыланды. Бұл орайда ел экономикасын әртараптандыру, өндірістік әлеуетті арттыру, шағын және орта бизнес пен ауыл шаруашылығын дамыту мәселелеріне баса назар аударылды. Көзделген мақсаттарға жету үшін аталған салаларды цифрландыру айрықша маңызды.

Сонымен қатар әлеуметтік инновация арқылы халықтың тұрмыс сапасын жақсарту жолдары қарастырылды.

Президент былтыр Жоғары білімді және ғылымды дамытудың 2029 жылға дейінгі тұжырымдамасы қабылданғанын атап өтіп, мемлекеттің аталған салаларға баса мән беретінін айтты.

Мемлекет басшысы Ғылым академиясының жай-күйін әрдайым жіті назарында ұстайтынын жеткізді. Сондай-ақ білімді, әлемдік үрдісті жетік білетін жастарға қолдау көрсетіле беретініне назар аударды.

Өз кезегінде Оразалы Сәбден ғылым саласын дамытуға қатысты өз ұсыныстарын айтты.