Жетісу облысында жолды күтіп ұстау жөніндегі талаптарды орындамаған 249 лауазымды тұлға жауапқа тартылды, деп хабарлады Halyq Uni тілшісі.

Жыл басынан бері жол ұйымдарына тексеру нәтижесінде анықталған кемшіліктер бойынша 1 360 ұйғарым жолданды.

Жалпыға ортақ пайдаланатын жолдар тексеруден өтеді. Автомобиль жолдарын күтіп ұстау жөніндегі талаптарды орындамағаны үшін 249 лауазымды тұлға жалпы сомасы 8 млн 590 мың 500 теңгеден астам айыппұл санкцияларын сала отырып, әкімшілік жауапкершілікке тартылды. Сонымен қатар көше-жол желісіндегі кемшіліктер үшін бірқатар ауданның тұрғын үй-коммуналдық шаруашылық басшылары жазаланды, – деді Жетісу облысы ПД әкімшілік полиция басқармасының бастығы Диас Айнақұлов.

Жыл басынан бері өңірде 2081 жол белгісі, 24 бағдаршам нысаны, 24 билборд, 92 өнеркәсіптік өндірістегі жасанды тегіс еместіктер орнатылды. Сондай-ақ 6,9 шақырым көше жарығы және 45,4 шақырым тротуар жолы жабдықталған.

Азаматтардың қауіпсіздігін қамтамасыз ету, жол көлік оқиғаларының алдын алу мәселелері полицияның тұрақты бақылауында. Айталық, бірқатар ауданда апатты-қауіпті учаскелерге 18 муляж бейнекамера мен 36 жол белгісін орнату туралы шешім қабылданды. Бұл жүргізушілерді тәртіпті болуға және жол қауіпсіздігін қамтамасыз етуге шақыру үшін жасалады, – деп атап өтті өңірдің әкімшілік полиция басқармасы.