18 тамызға дейін Атырау қаласының кейбір бөлігінде ыстық су беру уақытша тоқтатылды, деп хабарлады облыстық энергетикалық кешеннің баспасөз қызметі.

Қазір қалада жылу пункттерінің жабдықтары жөнделіп жатыр.

Тұрғындарға «Атырау жылу желілері» АҚ-ның жылу пункттерінің жабдықтарын тексеруге байланысты жөндеу жұмыстары жүргізілетінін хабарлаймыз. Бұл – кәсіпорынның күрделі жөндеу жоспарына сәйкес атқарылатын жұмыс. Сондықтан 14-18 тамыз аралығында жекелеген мекенжайлар бойынша ыстық су беру уақытша тоқтатылады, - деп жазылған хабарламада.

Бүгінде 3 жылу пунктінде жабдықтарды жөндеу басталған. Осыған байланысты «Ұшқын» орталық жылу пунктінен Азаттық, Қарымсақов, Стахановцев, М.Әуезов, Молдағалиев, Шәріпов, 8-наурыз көшелеріндегі 30, «Вокзал маңы-5 шағын ауданындағы №56 жылу пунктіне қарайтын 29, М.Баймұханов көшесінде орналасқан 3 тұрғын үйге ыстық су беру тоқтатылды.

Сондай-ақ «Лесхоз» орталық жылу пунктінен «Лесхоз» шағын ауданындағы 38, ал Медеубаев көшесіндегі 1 үйдің тұрғындары ыстық сусыз отыр.

Бүгін Әлия Молдағұлова көшесіндегі Д-355 мм су құбырында апаттық-қалпына келтіру жұмыстарын жүргізу қолға алынды. Сондықтан сағат 10:00-ден 18:00-ге дейін осы маңдағы 14 көшеде орналасқан тұрғын үйлер мен кеңселерге, өзге де нысандарға салқын су беру тоқтатылды.