Президенттің Жарлығымен Дәурен Абаев Қазақстанның Ресейдегі елшісі болып тағайындалды, деп хабарлады Ақорда.

Мемлекет басшысының Жарлығымен Дәурен Әскербекұлы Абаев Қазақстанның Ресей Федерациясындағы төтенше және өкілетті елшісі лауазымына тағайындалды, – деп жазылған хабарламада.

Бұған дейін Дәурен Абаев ТМД Бас хатшысының орынбасары қызметін атқарған.

Айта кетейік, ол 1979 жылы Алматы облысында дүниеге келген.

• 2001 жылы әл-Фараби атындағы Қазақ мемлекеттік ұлттық университетін бітірді.
• 2006 жылы Нидерландыдағы Лейден университетін тәмамдады.
• 2014 жылы Еуразиялық гуманитарлық институттың дипломын алды.
• Еңбек жолын 2001 жылғы тамызда Қазақстанның Сыртқы істер министрлігінің орталық аппаратында бастады.
• Кейін төрт жыл Қазақстанның Әзербайжандағы және Нидерландыдағы елшіліктерінде дипломаттық қызметте болды.
• 2007 жылғы мамырдан желтоқсанға дейін Сыртқы істер министрлігі баспасөз қызметі бөлімінің басшысы болған.
• 2013 жылғы шілдеде Қазақстан Президентінің баспасөз хатшысы әрі кеңесшісі болды.
• 2016 жылғы мамырда Ақпарат және коммуникациялар министрлігінің басшылығына келіп, 2019 жылғы 25 ақпанда Ақпарат және қоғамдық даму министрі болып тағайындалды.
• 2022 жылғы 14 қаңтарда Мәдениет және спорт министрі болды.