Бас прокуратурада ҰҚК, СЖҚІА, ҚМА, ІІМ-нің, аумақтық қылмыстық қудалау органдары мен прокуратура басшыларының қатысуымен күдікті адамдарды іздестірудің тиімділігін арттыру мәселелері қаралды, деп хабарлады Halyq Uni тілшісі.

Ведомство өкілдерінің мәліметінше, құқық қорғау органдарының бірлескен жұмысының нәтижесінде соңғы 3 жылда іздеудегі азаматтардың саны 5 мыңнан 2,5 мыңға дейін, яғни 2 есе төмендеген.

Бүгінде 284 адам аса ауыр, 1 553 адам ауыр, 574 адам орташа және онша ауыр емес қылмыс жасағаны үшін іздестіріліп жатыр.

Жыл басынан бері іздеу жарияланған 684 адамның 473-і ұсталды, бұл 70%-ды құрайды.

Ресей, АҚШ, Түркия, БАӘ, Қырғызстан, Өзбекстан және Украинадан бүгінде елге 95 азамат қайтарылды. Бұл қылмыстық қудалау органдарының үйлестірілген қызметі, іздестіру дерекқорларының күнделікті мониторингін ұйымдастыру және прокурорлық тексерулерді жүргізу, сондай-ақ халықаралық әріптестермен тығыз өзара іс-қимыл нәтижесінде мүмкін болды.

Ұйымдық және құқықтық шаралар кешенінен басқа, қылмыскерлерді ұстау үшін цифрлық технологиялар белсенді түрде енгізіліп жатыр. Бет-әлпетті танудың отандық алгоритмі жасалып, оның көмегімен 20-дан аса күдікті анықталды.

2022 жылдан бастап іздестіру жұмысының тиімділігін арттыруды қамтамасыз ететін «электрондық іздестіру журналы» жүйесі іске асырылып жатыр.

Сонымен қатар кеңесте проблемалық мәселелер, оның ішінде шет мемлекеттердің аумағында қылмыскерлерді ұстауға тартылған полиция қызметкерлерінің штат санын көбейту, сондай-ақ іздеудегі адамдардан іс жүргізу шығындарын өндіріп алу қажеттігі айтылды.

Шара соңында қылмыстық қудалау органдарының басшылары мен облыс прокурорларына қылмыскерлерді іздестіру және экстрадициялау жөніндегі жұмысты күшейту ұсынылды.

Бас бостандығынан айыруға байланысты емес бұлтартпау шарасы тағайындалған күдіктілердің тергеу органдары мен соттарға келуінен жалтаруға жол бермеуге бағытталған ұйымдастырушылық-құқықтық және өзге де шараларды қабылдау тапсырылды.