Қатарда футболдан әлем чемпионатының финалында Аргентина мен Франция құрамалары алтын жүлдені сарапқа салды. 

Дүниежүзілік додада қос құрама үш мәрте кездесіп, екеуінде Аргентина (1930 жылы – 1:0, 1978 жылы – 2:1) жеңіске жетті. 1978 жылғы өз елінде өткен чемпионатта Марадона бастаған аргентиналықтар жеңімпаз атанған еді.

Төрт жыл бұрын Ресейдегі жарыста 1/8 финалда Франция Аргентинадан 4:3 есебімен басым түсіп, сонда Килиан Мбаппе қос голдың авторы атанып, Лионель Месси көзге түсе алмаған болатын.

Биылғы чемпионатта бес голдан соғып, мергендер көшін бастап келе жатқан Месси мен Мбаппе финалдық матчта үздік атану үшін барын салатыны анық-ты. Әсіресе, бұл Мессидің соңғы әлем чемпионаты-тұғын.

Бұл жолы 21-минутта сол қанаттан айып алаңына екпіндей кірген Анхель Ди Марияны Усман Дембеле шалып құлатты. 23-минутта Лионель Месси 11 метрлік пенальтиді мүлтіксіз орындап, Аргентинаны алға шығарды. Есеп – 1:0.

Содан кейін 36-минутта Месси асырған допты Макаллистер Ди Марияға дәл берді. Ди Мария қателескен жоқ. Есеп – 2:0.

Екінші кезеңде 79-минутта аргентиналық Николас Отаменди Рэндал Коло Муаниге қарсы ойын тәртібін бұзды. Килиан Мбаппе 80-минутта пенальтиді құр жіберген жоқ. Іле-шала Коло Муаниден пас алған Мбаппе таразы басын теңестіріп үлгерді – 2:2. Ал 90+7-минутта Уго Льорис Мессидің қауіпті соққысын қайтарды.

Қосымша екі экстратаймда 109-минутта У.Льористен кері серпілген допты Месси қақпаға кіргізді – 3:2. Әйтсе де 118-минутта К.Мбаппе пенальтиден тепкен допты тағы да торда тулатты – 3:3. Бұл финалда хет-трик жасаған Килианның осы чемпионаттағы 8-голы еді. Ол сөйтіп біріншіліктің сұрмергені атанды.

Пенальти сериясында Францияны 4:2 есебімен жеңген Аргентина өз тарихында үшінші рет әлем чемпионы атанды.