Жазғы Азия ойындарында Қазақстан командасының капитаны Асланбек Шымбергенов 67 келіде әлем чемпионы атанған өзбекстандық Асаходжа Муйдинходжаевты нокаутпен жеңді. Бас бапкер Мырзағали Айтжанов аталған жекпе-жекке қатысты пікір білдірді.

Кездесудің алғашқы екі раундында төрешілер жеңісті қарсыласқа берді. Содан соң шешуші раундта Асланбек қарсыласын 3 мәрте нокдаунға жіберіп, мерзімінен бұрын жеңіске жетті. Бокс ережесі бойынша бір раундта 3 рет нокдаун алған боксшы нокаутпен жеңілді деп есептеледі.

Алғашқы екі раундта Асланбек жеңіп тұрса да төрешілер қарсыласқа беріп жіберді. Үшінші раунд басталарда оған: «Нокаутпен жеңіп шық», - дедім. Айтқаным айдай келді. Асланбек 3 рет нокдаун беріп, қарсыласын нокаутқа жіберді. Барша жанкүйерлерге рахмет! Елде отырып, бізге жанкүйер болған халыққа рахмет, - деді бас бапкер Мырзағали Айтжанов.

Еске сала кетсек, Асланбек Шымбергенов – 71 келі салмақта әлем және Азия чемпионы.