Қарағанды облысында өз-өзіне пышақ салған ауыл тұрғынын учаскелік полицейлер құтқарып қалды, деп хабарлады Halyq Uni тілшісі.

Бұқар-Жырау ауданына қарасты Ғабиден Мұстафин атындағы кентте орналасқан полиция бөліміне қадағалау жасайтын аумақтардың бірінде өз үйінің ауласында ер-азаматтың пышақпен жүргені туралы хабарлама түсті. Оқиға орнына бірден учаскелік полиция инспекторлары Тілектес Маханов пен Қанат Орманбетов барды.

Үйге кіреберісте бізді бір әйел адам күтіп алды. Сол адам полицияға қоңырау шалып, ұлының орынсыз қылықтары туралы хабарлаған. Біз үйдің ауласына кіргенімізде ұлы ол жерде болмады. Арызданушы оның үйге кіріп кеткенін, ал өзінің кіруге қорқып тұрғанын айтты. Біз ер-азаматты үйдегі бөлмелердің бірінен төсекте жатқан жерінен таптық. Ол кезде оның сол қолындағы пышақ жарақатын көрдік. Сөйтсек, өз-өзіне қол жұмсап, ас пышағымен сол жақ қолының тамырын кесіп жіберген екен. Қанды тоқтату мақсатында қолын жгутпен қысып тастадық. Жедел жәрдем қызметкерлері келген соң оны дәрігерлерге табыстадық, – деді учаскелік полиция инспекторы Тілектес Маханов.

Полиция қызметкерлерінің жедел әрекеттері бір қайғылы жағдайдың алдын алды. Жәбірленушінің анасы тәртіп сақшыларына алғысын білдірді.