Алматы полициясы Денис Теннің ескерткішін қорлады деген күдікке ілінген ер адамды ұстады. Бұл туралы қалалық ПД баспасөз қызметі хабарлады.

Денис Тен ескерткішіне вандализм жасады деген күдікке ілінген адам ұсталды. Ол – психоневрология есебінде тұрған, Алматы қаласының тұрғыны. Қылмыстық іс аясында сараптамалар тағайындалды, оның қорытындысы бойынша процессуалдық шешім қабылданады. Ұсталған адам психикалық сауықтыру орталығына орналастырылды, – делінген хабарламада.

Бұған дейін әлеуметтік желіде қазақстандық мәнерлеп сырғанаушы Денис Теннің Алматыда орнатылған ескерткішінің фотосуреті пайда болған еді. Одан біреудің ескерткішке қара фломастермен сурет салып кеткенін көруге болады. Сондай-ақ жарияланған фотосуретке ол өзінің тегін, атын, әкесінің атын, телефон нөмірі мен тұрғылықты мекенжайы туралы мәліметтерін қалдырған.

Алматы қаласы полиция департаментінің өкілдері аталған дерек бойынша Қылмыстық кодекстің 294-бабы 1-бөлігі бойынша сотқа дейінгі тергеу жүргізіліп жатқанын хабарлады.