Қонаевта 39 жастағы ер адамның мәйіті табылды, деп хабарлады Halyq Uni тілшісі.

Алматы облысы ТЖД баспасөз қызметінің мәліметінше, кеше сағат 20.55-те Қонаев қаласының «Рауан» шағын ауданында «Boot Station» демалыс аймағының жанында жедел-құтқару жасағының күштері 1984 жылы туған ер адамның денесін тауып, судан шығарған.

Ер адам шамамен 20:05-те толқын басқыдан (толқын басқы – ағындардан, толқындардан және дауылдан қорғауға арналған жағалаудағы аймақта салынған тұрақты құрылыс) суға секіру кезінде қайтыс болды. Дәрігерлер алдын ала «мойыны сынған» деген диагноз қойды. Сот-медициналық сараптамасы тағайындалды, – делінген ТЖД хабарламасында.

Сонымен қатар, онымен бірге болған 3 адамға ҚР ӘҚБтК-нің 412-бабы бойынша 36 мың 225 теңге сомасында әкімшілік айыппұл салынды.

Оқиға орнына ТЖД жедел-құтқару жасағының 6 құтқарушысы мен 2 жүзу құралы жұмылдырылды.

Алматы облысының ТЖД азаматтардан судағы қауіпсіздік ережелерін сақтауын сұрайды.