Бүгін футболдан УЕФА Конференция лигасының екінші іріктеу кезеңі аясында қазақстандық төрт клуб кездесу өткізеді.

Атап айтқанда, «Қызыл-Жар» – «Осиек», «Қайрат» – «Кишварда», «Тобыл» - «Линкольн Ред Импс» және «Ракув» - «Астана» матчы болады.

Кездесулерді «Qazaqstan» және «Qazsport» телеарналары тікелей эфирде көрсетеді.

Петропавлдың «Қызыл-Жар» астанада Хорватияның «Осиек» командасымен кездеседі. Матч Нұр-Сұлтан уақытымен 18.00-де басталады. Ойынды QAZSPORT телеарнасы тікелей эфирде көрсетеді.

Чемпиондар лигасының бірінші іріктеу кезеңінен аса алмаған «Тобыл» өз алаңында гибралтарлық «Линкольн Ред Импс» командасын қабылдайды. Қостанайда өтетін матч 20.00-де басталады. Бұл кездесуді де QAZSPORT телеарнасынан тамашалауға болады.

«Қайрат» – «Кишварда» матчы да жергілікті уақытпен 20.00-де басталады. Алматыдан тікелей трансляцияны QAZAQSTAN телеарнасы жүргізеді.

Қазақстандық командалар арасында «Астана» ғана алғашқы ойынын сырт алаңда өткізеді. Елордалықтар Польшада «Ракувпен» кездеседі. Ойын астана уақытымен 22 шілдеге қараған түні 01.00-де басталады. Кездесуді QAZSPORT телеарнасынан тікелей эфирде көруге болады.