Жамбыл облысында прокурорлар жасалмаған жұмыс үшін бюджет қаражатын төлеу дерегін анықтады, деп хабарлады Halyq Uni тілшісі.

Тараз қаласының прокуратурасы бюджет қаражатының жұмсалу заңдылығына жүргізген тексерудің нәтижесінде Тараз қаласы әкімдігінің тұрғын-үй коммуналдық шаруашылық, жолаушылар көлігі және автомобиль жолдары бөлімінде әзірленбеген 4 сметалық құжаттама үшін 75 млн теңгені негізсіз мердігерге аударғанын анықтады.

Аталған дерек бойынша қала прокуратурасы ҚР ҚК-нің 189-бабы 4-бөлігінің 2-тармағымен («Сеніп тапсырылған бөтен мүлікті иемденіп алу немесе талан-таражға салу») қылмыстық істі тіркеді. Тергеп-тексеруді жүргізу Сыбайлас жемқорлыққа қарсы іс қимыл агенттігінің Жамбыл облысы бойынша департаментіне тапсырылды, – делінген прокуратура хабарламасында.

Тергеу амалдары жүргізіліп жатыр. ҚПК-нің 201-бабына сәйкес, өзге ақпарат жариялауға жатпайды.