Біріккен Араб Әмірліктеріндегі Рас-әл-Хаймада отшашу бойынша рекорд орнады, деп хабарлады 24.kz.

Әмірлікте жаңа жыл түні жағалауда ұйымдастырылған пиротехникалық шоу 4,5 шақырымды қамтыды. Бұл ең ұзақ қашықтық ретінде Гиннесс рекордтар кітабына енді.

Шоу 8 минутқа cозылды. Онда мыңнан аса жарық диодты дрондар мен суға арналған отшашу секілді инновациялар қолданылған.

Шараны тамашалау үшін 50 мың адам жиналған. Бұл жергілікті туризмнің дамуына серпін беріп отыр. Өйткені қонақ үйлерде бос орын болмаған.

Айта кеткен жөн, Рас-әл-Хайма әмірлігі осымен бірнеше жыл қатарынан жаңажылдық отшашу бойынша рекордтар орнатып, туристік әлеуетін арттырып келеді.

2023 жыл Рас-әл-Хайма әмірлігінің туризмі үшін табысты жыл болды. Біз зор жетсітікке қол жеткіздік. Соның арқасында 2030 жылы 3 миллионнан аса саяхатшыны қабылдау мақсатымызға бір қадам жақындай түстік, - дейді Рас-әл-Хайма әмірлігі туризмді дамыту жөніндегі департаментінің басшысы Раки Филлипс.