Еңбек және халықты әлеуметтік қорғау министрлігі еңбек міндеттерін орындау кезінде жұмысшыларды жазатайым оқиғалардан міндетті сақтандыру жүйесін жетілдіруді көздейтін заңнамаға түзетулер топтамасын әзірледі, деп хабарлады Halyq Uni тілшісі.

Тиісті заң жобасын Мәжіліс қабылдап, Сенаттың қарауына жолдады.

Заңнамаға енгізілген түзетулерде төмендігілер көзделген:

• Өмірді сақтандыру компанияларының жұмыс берушінің алдын алу шараларына жұмсаған шығындарын төленген сақтандыру сыйақысының 6%-ына дейін өтеуі.

Алдын алу шараларына мыналар жатады: басшылар мен еңбек қауіпсіздігі және еңбекті қорғауды қамтамасыз етуге жауапты адамдарды оқыту; кәсіптік тәуекелдерді бағалау; нормативтік-техникалық құжаттама әзірлеу; мерзімді медициналық тексерулер жүргізу; өндірістік жарақаттану қаупінің дәрежесіне әсер ететін негізгі құралдарды жаңғырту; ұжымдық қорғау құралдарын, сондай-ақ қауіпсіздік жүйелерін орнату.

• Өмірді сақтандыру компанияларының төленген сақтандыру сыйақысының 6% шегінде оңалту шараларына арналған шығыстарды өтеуі.

Оңалту шаралары: әлеуметтік-психологиялық оңалтуды; кәсіптік және еңбекті оңалтуды; зардап шеккен қызметкердің денсаулығына зиян келтіруден туындаған жұмыс берушінің қосымша шығындарын; қалпына келтіруді және реконструктивтік терапияны көздейді.

Зардап шеккен қызметкердің санаторий-курорттық емделуінің өмірін сақтандыру компанияларының 100 айлық есептік көрсеткішке (бұдан әрі – АЕК) дейінгі мөлшерде төлеуі. Қызметтердің құны 100 АЕК-тен асқан жағдайда алушының есебінен әлеуметтік төлем жасау мүмкіндігі болады.

• Зардап шеккен қызметкерлерді әлеуметтік қорғауды күшейту.

Қазір регрессиялық төлемдердің мөлшерін есептеу кезінде жұмысшының кінәсі де анықталады. Егер жұмысшының кінәсі, мысалы 50% мөлшерінде анықталса, онда оған тиісінше төлемнің тек 50%-ы ғана беріледі. Жаңа түзетулер оған өзгеріс енгізеді. Тиісінше, жұмысшы еңбек жарақатын алған кезде өміріне және денсаулығына келтірілген зиянды өтеу толық көлемде іске асырылады.

Бұдан басқа, заңнамаға енгізілген түзетулерде кәсіптік еңбекке қабілеттілігінен айырылу дәрежесі 2015 жылғы 10 мамырға дейін алғаш рет 30-дан 100%-ға дейінгі мөлшерде белгіленген және 2015 жылғы 10 мамырдан бастап 2024 жылғы 1 қаңтарға дейінгі кезеңде куәландыру мерзімінсіз ұзартылған немесе қайта куәландырылған адамдарға сақтандыру ұйымдарының қаражаты есебінен сақтандыру төлемдерін өмір бойы іске асыру көзделген. Мұндай алушылардың саны – шамамен 1,4 мың адам.