Денсаулық сақтау министрлігі басшысының міндетін вице-министр Жандос Бүркітбаев атқарады. Бұл туралы ведомствоның баспасөз қызметінен хабарланды.

Премьер-министр қол қойған құжзатта Денсаулық сақтау министрінің міндетін атқару вице-министр Жандос Қонысұлы Бүркітбаевқа жүктелетіні айтылған.

Айта кетері, 20 желтоқсанда мемлекет басшысы Алексей Цойды Денсаулық сақтау министрі қызметінен босату туралы жарлыққа қол қойды.

Ал Алексей Цой әлеуметтік желіде жазба жариялап, денсаулық сақтау саласын ғылым мен әлеуметтік бастамалар арқылы дамытуды қолға алатынын мәлімдеді.

Жандос Бүркітбаев 1971 жылы Жамбыл облысында дүниеге келген. 1996 жылы C. Асфендияров атындағы Алматы ұлттық медицина университетін (емдеу ісі), 2003 жылы Л. Гумилев атындағы Еуразия ұлттық университетін (мемлекеттік және жергілікті басқару), 2007 жылы Оңтүстік Қазақстан мемлекеттік медицина академиясын (фармация), 2018 жылы ҚДСЖМ Қазақстан медицина университетін тәмамдаған.

Еңбек жолын 1996 жылы Алматы қалалық жедел медициналық жәрдем клиникалық ауруханасында дәрігер-терапевт болып бастаған.

Әр жылдары Алматы қаласындағы Республикалық апаттар медицинасы орталығының дәрігері, Денсаулық сақтау министрлігінің бас маманы, бөлім басшысы, басқарма басшысы, Парламент Мәжілісінің әлеуметтік-мәдени даму комитетінің қызметін қамтамасыз ету бөлімі меңгерушісінің орынбасары қызметтерін атқарған.

2008 жылы Астана қаласы «Қан орталығы» ШЖҚ МКҚК басқарды.

2011-2019 жылдары — Трансфузиология ғылыми-өндірістік орталығының директоры.

2019 жылғы 23 қаңтардан бастап «Ұлттық ғылыми онкологиялық орталық» ЖШС басқарма төрағасы қызметін атқарды.

2021 жылдың қаңтарынан бастап Үкімет қаулысымен Жандос Қонысұлы Бүркітбаев Денсаулық сақтау вице-министрі қызметіне тағайындалды.