Бүгін елорда тұрғыны Бекзат Тілеген жеңілдетілген автонесие бойынша алғашқы көлікті алды. Ол 6,5 млн теңгеге 4 пайызбен көлік алғанын айтты.

16 мамырда автокөлікке тапсырыс бердік. Бізге менеджер төлемақының есепшотын берді. Сосын банке барып, үш күн жауабын күттік. Содан кейін автосалонның менеджері хабарласып, рәсімдеуге шақырды, - деді ол.

Жеңілдетілген автонесиеге өтінім қабылдау 16 мамырда басталған болатын. Тұрғындардың өтінішін екінші деңгейлі үш банк қабылдап жатыр.

Осыған дейін жеңілдетілген автонесие алуға 4 290 азамат ниет білдіріп, олардың өтініші мақұлданды.

Жеңілдетілген автокредит алу шарттары:

• сыйақы мөлшерлемесі: 4 пайыз
• несие сомасы: 10 миллион теңгеден аспайды
• қаржыландыру мерзімі: 7 жылдан аспайды
• бастапқы жарна: 0 пайыздан бастап
• көлік құны: 15 миллион теңгеден аспайды.

Сондай-ақ қарыз алушы екі жылдың ішінде бір реттен артық автокредит ала алмайды. Халықтың әлеуметтік осал топтарындағы азаматтарға автокредит алуға басымдық беріледі.