«Дене шынықтыру» пәні бойынша мектеп оқушыларының республикалық олимпиадасы өтеді. Бұл туралы Оқу-ағарту министрлігінің Ұлттық ғылыми-практикалық дене тәрбиесі орталығы хабарлады.

Ведомство өкілдерінің мәліметінше, пәндік олимпиада мына үш кезең бойынша өтеді:

Бірінші кезең – аудандық. 2023 жылдың қыркүйек айында аудандық білім бөлімдері өткізеді.

Екінші кезең – облыстық (қалалық). Облыстық кезеңді 2023 жылдың 5 қазанына дейін Астана, Алматы және Шымкент қалаларының облыстық білім басқармалары өткізеді.

Үшінші кезең – республикалық. 2023 жылдың 23-27 қазанында Алматы қаласында өтеді.

Дәстүр бойынша еліміздің мектеп оқушылары арасында дене шынықтыру пәні олимпиадасы үшінші рет өткізілмек.

Мұндай іс -шараны республикалық деңгейде өткізу білім алушыларды спортпен шұғылдануға, саламатты өмір салтын ұстануға ынталандырады, сондай-ақ оқушылардың дене тәрбиесін қалыптастыруға үлкен әсер етеді, – деді ҰҒПДТО директоры Сағдат Садықов.

Олимпиадаға жалпы білім беретін мектептердің, гимназиялар мен лицейлердің 5-6, 7-8 сынып оқушылары, «Дене шынықтыру» пәні бойынша олимпиаданың екінші кезеңінің жеңімпаздары мен жүлдегерлері қатысады.