«Қазпошта» АҚ пен Vietnam Post корпорациясы арасында электрондық коммерция мен пошта қызметін дамыту саласындағы өзара түсіністік туралы негізгі меморандумға қол қойылды, деп хабарлады ұлттық компанияның баспасөз қызметі.

Келісім мемлекет басшысы Қасым-Жомарт Тоқаевтың Вьетнамға ресми сапары аясында жасалды.  

Қос тарап арасындағы меморандум электрондық коммерцияны дамытуды, тарифтік саясатты оңтайландыруды, ақша аударымы жүйесін жаңғыртуды, жеткізу маршруттарын оңтайландыруды көздейді.

Құжат 2 пошта операторы арасындағы өзара тиімді қарым-қатынасты нығайтады.

Vietnam Post-пен серіктестік тәжірибе алмасуға, үздік дағдыларды алуға, сондай-ақ тұтынушылар үшін қызмет көрсету сапасын жақсартуға мүмкіндік береді деп сенеміз, - деді «Қазпошта» АҚ басқарма төрағасы Әсел Жанасова.