Шымкентте бизнес ашуға мемлекеттен грант алып беремін деп танысын алдаған әйел анықталды, деп хабарлады Polisia.kz.

Абай ауданы полиция басқармасына жергілікті тұрғын арызданған. Айтуынша, одан 2 жылдан бері танитын әйел Үкіметтен кәсіп ашу үшін ақша алып беремін деп алдын ала 100 мың теңге алған. Алайда уәдесін орындамай, сандалтып қойған.

Бұл дерек Қылмыстық кодекстің 190-бабы 1-бөлігі бойынша («Алаяқтық») сотқа дейінгі тергеп-тексерудің бірыңғай тізіміне енгізілді.

Криминалдық полиция бөлімінің қызметкерлері күдіктінің кім екенін анықтау үшін жедел іздестіру жұмыстарын жүргізді. Нәтижесінде күдіктінің 44 жастағы жергілікті тұрғын екені белгілі болды. Әйел бұрын-соңды істі болмаған.

Бүгінде ұсталған күдікті өз кінәсін мойындады. Tергеу жалғасып жатыр.