Батыс Қазақстан облысы Бәйтерек ауданының әкімі Марат Тоқжановтың 2022 жылдың көктемінде қарамағындағы қызметкерлерімен кездесуде бір сағаттан астам балағат сөздер айтқан оқиғасы қалай аяқталғаны белгілі болды. Бұл туралы Мемлекеттік қызмет істері агенттігінің БҚО бойынша департаменті мәлімдеді, деп хабарлайды «Уральская неделя» басылымы.

Ведомствоның мәліметінше, шенеунікке қатысты тәртіптік іс тәртіптік жаза қолдану мерзімінің аяқталуына байланысты тоқтатылған.

Қызметтік тергеу кезінде жиналыстың нақты күні анықталды. Ол 2022 жылдың 3 сәуірінде болғаны белгілі болды.

«Мемлекеттік қызмет істері агенттігі төрағасының бұйрығына сәйкес қызметтік тергеу жүргізілді. Материалдарды қарау қорытындысы бойынша Әдеп жөніндегі комиссия Бәйтерек ауданы әкімі Тоқжанов тарапынан мемлекеттік қызметшілердің Әдеп кодексінің нормаларын бұзу фактісін анықтады. Сонымен қатар мемлекеттік қызметшілерге тәртіптік жаза қолдану мерзімінің аяқталуына байланысты Тоқжановқа қатысты тәртіптік іс тоқтатылды», – деп хабарлады Мемлекеттік қызмет істері Агенттігінің БҚО бойынша департаменті.

Ведомство  «Мемлекеттік қызмет туралы» заңының 45-бабы негізінде тәртіптік жаза теріс қылық анықталған күннен бастап бір айдан кешіктірілмей қолданылатынын түсіндірді.

«Тоқжановтың еңбекке уақытша жарамсыздығы және теріс қылық анықталған кезде еңбек демалысында болған кезеңдерін ескере отырып, тәртіптік жауапкершілікке тартудың мерзімі өтіп кетті»,– деп түсіндірді департамент.

Еске салайық, бұған дейін Бәйтерек ауданы әкімінің жиналысындағы аудиожазбасы желіге тарап кеткен болатын. Ол 1 сағат 20 минутқа созылды, осы уақыт ішінде шенеунік әдепсіз сөздер қолданған. Кейін қызметтік тергеу басталғаны белгілі болды.