29 қазанда Түркістан қаласындағы «Olympic center» спорт сарайында алғаш рет қазақтың ұлттық күресінен «Turan Barysy» Азия кубогы үшін турнир өтеді. Оған Түркі мемлекеттері ұйымының өкілдері – Түркия, Түрікменстан, Өзбекстан, Әзербайжан, Қырғызстан, Венгрия және Қазақстан балуандары қатысады.

Дүрмекті додаға 7 елдің ең мықты деген спортшылары келе жатыр. Олардың арасында қазақ күресімен қоса, дзюдодан, самбо мен кураштан халықаралық жарыстарда жүлде алып жүрген спортшылар да бар. Әзербайжан құрамасы атынан самбодан екі дүркін әлем чемпионы Эйваз Бақшиев (60 кг) күш сынасады. Венгрия құрамасы сапында дзюдодан Еуропа чемпионы Эндре Гунич (82 кг), дзюдодан әлем чемпионатының күміс жүлдегері, Еуропаның үш дүркін чемпионы Барна Бооур (+90 кг) Азия кубогында құрмет тұғырының ең биік сатысынан көрінуге үмітті. Ал түркиялық Фуркан Гүнер – дзюдодан Еуропа чемпионы атанған спортшы.

Түрікменстан құрамасының балуандары да осал қарсылас емес. Кураштан әлем чемпионы Шаммухамет Курбанов (66 кг) пен самбодан екі дүркін әлем чемпионы Самвел Айрапетян (82 кг) Түркістан төрінде боз кілемде мықтылармен белдеседі. Түрікменстандық Тежен Теженов самбодан бірнеше дүркін әлем чемпионы. Ол 2017 жылы Минск қаласында қазақ күресінен әлем чемпионы атанған.

Өзбекстан балуандары қазақ күресінен өтіп жатқан халықаралық жарыстарда жақсы өнер көрсетіп жүр. Құрама сапында кураштан әлем чемпионы Умид Есанов (82 кг), кураштан әлем чемпионы, дзюдодан Азия чемпионы Еркін Козоков (90 кг), кураштан үш дүркін әлем чемпионы, қазақ күресінен екі дүркін әлем чемпионы Мухсин Хисомиддинов (+90 кг) бар.

Азия кубогында қазақ балуандарына да үлкен үміт артылып отыр. Қазақстан сапында 90 кг салмақта Айдарбек Тоқтарбек 2021 жылы қазақ күресінен әлем чемпионы атанды. 90 килодан аса салмақта Ғалымжан Қырықбай – «Қазақстан барысы» республикалық турнирінің 2021 жылғы күміс, 2022 жылғы қола жүлдегері.

Турнир еліміздегі ұлттық спорт түрін дамыту және қолдау мақсатында өткізіледі.

«Turan Barysy» турнирі Мәдениет және спорт министрлігі мен Түркістан облысы әкімдігінің, сондай-ақ, «Qazaq kuresi» ассоциациясы, «Qazaqstan Barysy» қазақ күресін қолдау және дамыту қорының ұйымдастыруымен өтеді. Турнирдің бас серіктестері – «Самұрық-Қазына» ҰӘҚ АҚ және «Туризм мен спортты қолдау және дамыту қоры».

Жанкүйерлер турнирді Qazsport және TRT Avaz телеарналарының тікелей эфирінен тамашалай алады.