2022 жылғы 28 маусымда Оңтүстік Кореяның Сеул қаласында Энергетика вице-министрі Жандос Нұрмағанбетов бастаған қазақстандық делегация мен Оңтүстік Кореяның Сауда, өнеркәсіп және энергетика министрлігінің өкілдері, сондай-ақ ядролық технологияларды жеткізуші – Korea Hydro & Nuclear Power (KHNP) компаниясы арасында кездесу өтті.

Кездесу барысында «Қазақстандық атом электр станциялары» ЖШС мен KHNP арасында атом энергетикасын дамыту саласындағы өзара түсіністік туралы меморандумға қол қойылды.

Осы меморандумға қол қою Қазақстан мен Оңтүстік Корея арасындағы атом энергиясын дамыту саласындағы стратегиялық әріптестікті нығайтуға ықпал ететін болады.

Еске салайық, Қазақстанда алғашқы АЭС салуға төрт мердігердің тізімі жасалды.  

Энергетика министрлігінің баспасөз қызметі мәліметінше, «Самұрық-Қазына» қоры ведомство және мүдделі ұйымдармен бұрын ұсынылған ұсыныстар негізінде алты әлемдік мердігер технологиясын қарады. Олар - америкалық NuScale Power, америка және жапондық GE-Hitachi, кореялық KHNP, қытайлық CNNC, ресейлік «Росатом» және Франциядағы EDF.

KHNP компаниясы туралы:

Айта кетейік, оңтүстік кореялық KHNP компаниясы Оңтүстік Кореяның 24 АЭС-іне иелік ететін және басқаратын KEPCO еншілес ұйымы болып табылады. АЭС қуаты бойынша KHNP әлемде 3-ші орында және техникалық-экономикалық негіздемелерді әзірлеуден бастап, АЭС салу және пайдалануға беруге дейін станция конструкцияларын түрлендіру мен жетілдіру бойынша техникалық көмек көрсетеді.

Қазір KHNP БАӘ-де APR-1400 реакторлары бар Барак АЭС-нің 4 энергия блогын салу бойынша жобаны іске асыруда, оның екеуі 2020-2021 жылдары пайдалануға берілді.