Премьер-министр Әлихан Смайылов орталық мемлекеттік органдар басшылары және дипломатиялық корпус пен жеке бизнес өкілдерінің қатысуымен Инвестициялық ахуалды жақсарту жөніндегі кеңестің кезекті отырысын өткізді, деп хабарлады Үкіметтің баспасөз қызметі.

Кеңесте негізінен салық саясаты саласында жүргізіліп жатқан реформалар, инвестициялық ынтымақтастық, зияткерлік меншік құқығын қорғау, ауыл шаруашылығы тауарын өндірушілерді субсидиялау және тағы басқа мәселеге назар аударылды.

Әлихан Смайылов инвестициялар тарту – экономикалық өсудің негізгі факторларының және Үкімет жұмысы басымдықтарының бірі болып қала беретінін атап өтті.

Атап айтқанда, елімізде жеке шарттарда келісімдер жасауға мүмкіндік беретін инвестициялық шарттардың жаңа тетіктері енгізілді. Бұдан бөлек, Инвестициялық міндеттемелер туралы келісімді жасасқанда салық заңнамасының тұрақтылығына 10 жылға кепілдік беріледі және күрделі жобалар үшін жетілдірілген модельдік келісімшартты жасасқанда фискалдық ынталандырулар енгізіледі.

Резидент емес тұлғалардан алынған материалдық емес қызметтер үшін шегерім сомасын шектеуге қатысты инвесторлар жиі көтеретін мәселе шешілді. Енді бұл шектеу тек оффшорлық юрисдикциялардағы компаниялармен жүргізілген операцияға қатысты болады, - деді премьер-министр.

Үкімет басшысы инвестициялық тартымдылықты арттырудың маңызды аспектілерінің бірі болжамды және ашық салық саясаты екенін айтты. Осыған байланысты Қазақстанда фискалдық реттеуді жетілдіру үшін жаңа Салық кодексі әзірленді.

Бүгінде ол бизнес-қоғамдастық және халықаралық ұйымдар өкілдерімен әртүрлі алаңдарда қызу талқыланып жатыр. Жыл басынан бері 250-ден аса жұмыс кездесуі өткізіліп, мыңнан аса ұсыныс түскен. Барлық мәселе апта сайын тұрақты жұмыс тобының қарауына ұсынылады.

Қолданыстағы ынталандыруларды сақтай отырып, жаңа Салық кодексі шеңберінде салық төлеушіге бағытталған сервистік әкімшілендіру моделі енгізіледі. Салық есептілігі 30%, ал салық төлемдерінің саны 20% қысқарады, - деді Әлихан Смайылов.

Ол бөлшек салық режимін қолдану бойынша қызмет түрлері 2 есе кеңейтіліп, 1 млн-нан аса салық төлеушіні қамтитынын айтты. Бұдан бөлек, өңдеу өнеркәсібіндегі жаңа жобалар 3 жылға салықтан босатылады.

Сондай-ақ қабылданған шаралар нәтижесінде Қазақстанның IMD әлемдік бәсекеге қабілеттілік рейтингінде бір жылда 6 сатыға көтеріліп, 37-орынға табан тірегені атап өтілді.

Жиын соңында Үкімет басшысы құзырлы мемлекеттік органдарға айтылған барлық ұсынысты пысықтауды тапсырды.