Құрбан айт мерекесі күні астаналық еріктілер тұрмысы нашар отбасылар мен мұқтаж жандарға ет таратты.

Бұл туралы елорда әкімдігінің ресми сайты хабарлады.

Құрбан айт мерекесіне орай Нұр-Сұлтан қаласының белсенді жастары, қала тұрғындары, аудандық әкімдіктердің, қала әкімдігі басқармаларының өкілдері біріге отырып, үш күн бойы мұқтаж азаматтарға ет таратуды ұйымдастырып жатырмыз. Бүгінгі іс-шараға волонтерлер мен автоволонтерлер қатысып отыр. Олардың жалпы саны 500-ден асады. Бұл іс-шара әкімдіктің қолдауымен соңғы бес жылда тұрақты түрде жүзеге асырылып келе жатыр, – деді «Жастар саясаты мәселелері басқармасы» ММ бөлім басшысы. Аян Ерментаев.

Оның басты мақсаты – қасиетті мерекеде мұсылмандық парызды орындау, мұқтаж жандарға көмектесу. Аталған игі істің басы-қасында жүрген еріктінің бірі – Дамир Айтымовтың айтуынша, Құрбан айт мерекесіне орайластырылып өткізіп жатқан іс-шараның сауабы мол. Құрбандыққа шалған мал етінің бір бөлігін әлеуметтік аз қамтылған отбасылар мен мұқтаж жандарға таратылып жатыр.

Еріктілер бұған дейін де мерекелерде мұқтаж отбасыларға азық-түлікті таратып, сауапты іске мұрындық болған.