Екібастұзда мемлекетаралық іздеуде жүрген шетелдік азамат ұсталды, деп хабарлады Halyq Uni тілшісі.

Полиция қызметкерлерінің мәліметінше, 15 қарашада рейдтік іс-шара барысында құрылыс нысандарының бірінде тиісті рұқсатсыз еңбек қызметін іске асырғаны үшін Тәжікстан Республикасының 3 азаматы ұсталды. Аталған азаматтар жеке басын анықтау үшін көші-қон қызметі бөліміне жеткізілді.

Деректер базасы бойынша тексеру кезінде 3 шетелдіктің Қазақстанға жеке мақсатпен келгені анықталды. Сондай-ақ 22 жастағы шетелдікке биылғы шілдеде Ресей Федерациясы ІІМ-нің кісі өлтіргені үшін Челябинск қаласы бойынша мемлекетаралық іздеу жариялағаны анықталды. Ұсталғаны туралы іздестіру бастамашыларына хабарланды, – деп атап өтті Павлодар облысы полиция департаментінің баспасөз қызметі.

Сондай-ақ екі шетелдікке қатысты көші-қон заңнамасын бұзғаны үшін ӘҚБтК 5-бөлігінің 517-бабы («Шетелдiктiң немесе азаматтығы жоқ адамның Қазақстан Республикасының халықтың көші-қоны саласындағы заңнамасын бұзуы») бойынша әкімшілік материалдар толтырылды.