Қазір медициналық мекемелер қалыпты жұмыс режиміне көшті
Белгісіз біреулер екі ауруханаға жарылғыш зат қойылғанын хабарлаған. Артынша науқастар мен қызметкерлер эвакуацияланды. Алайда тексеру барысында хабар расталмады. Яғни ауруханадан мина табылған жоқ.
Таңғы сағат 10:57-де екі нысанның жұмысы тоқтатылды. Тексеру барысында жарылғыш құрылғылар табылмады. Сондықтан медициналық мекемелер қалыпты жұмыс режиміне көшті, - деді Алматы қалалық полиция департаментінің ресми өкілі Салтанат Әзірбек.
Қазір жалған ақпарат таратқан азамат іздестіріліп жатыр. Күдікті қолға түссе, ҚР ҚК 273-бабына сәйкес (лаңкестік актісі туралы көрінеу жалған хабар тарату) қылмыстық жауапкершілікке тартылады. Қолданыстағы заңнамада ірі көлемде ақшалай айыппұл, бас бостандығын шектеу немесе бес жылға дейін бостандығынан айыру түріндегі жаза көзделген.