Алматыда жалған долларды бірнеше рет сатқан 2 тұрғынға сот үкімі шықты, деп хабарлайды Halyq Uni тілшісі.

Қаржылық мониторинг агенттігі Алматыда ірі көлемде жалған 100 долларды сату фактісін анықтады. Күдіктілер жалған купюраларды өткізу кезінде ұсталды. 

2 алматылық криптовалюта сатып аламыз деген желеумен жалған долларды бірнеше рет сатқан. Жалған ақшаның жалпы сомасы – 32 700 доллар.

Сот үкімімен 2 айыпталушы кінәлі деп танылды. Олар 5 жылдан 5,5 жылға дейін бас бостандығынан айырылды,  - деп жазылған хабарламада.

Айта кетейік, жыл басынан бері агенттік Қазақстанда айналымнан 1060 жалған банкнот тәркіледі. Оның ішінде:

• 647 100 теңге – 141 купюра,
• 90 400 доллар – 905 купюра,
• 2 мың еуро – 4 купюра,
• 1 мың юань 10 купюра анықталды.

Тәркіленген жалған ақшаның жалпы құны 43 млн теңгеден асады.

Сондай-ақ биыл жалған купюраны жасап сатқаны үшін 8 адам 5 жылдан 6 жылға дейін сотталды.

ҚМА валюта айырбастау кезінде қазақстандықтар сақ болу керегін ескертеді.