Қостанай облысының Жангелдин ауданына қарасты Бидайық ауылының шаруалары киіктер егіс алқаптарын таптап тастады деп шағымданды.

Облыстың оңтүстігіндегі бұл аумақта астық шығыны онсыз да төмен. Диқандар гектарына 8 центнерден өнім алса, соны қанағат тұтады. Ал киіктердің кесірінен бұл көрсеткіш былтыр 2-3 центнерге дейін азайған.

Барлығы 10 мың гектарға дән сепкен 6 шаруа «дақылды күтіп-баптаудың орнына, киіктерді қорумен әуреміз» деп отыр. Енді оларға тығырықтан шығудың жалғыз жолы – алқаптарды қоршау. Алайда оған қыруар қаржы кететіні белгілі. Қайрат Райысов атты шаруаның айтуынша, бұл жұмысты мемлекеттің көмегінсіз жүзеге асыру әсте мүмкін емес.

«Менің өз жерімді былтыр есептегенімде, қоршау үшін 125 миллион теңге қажет екен. Бұл мен үшін екі комбайнның құны. Жалғыз мен емес, басқалар да бар. Бұл ақша әжептәуір өседі. Мысалы, шетелдерде аңды қорғау үшін заң қабылдағанда оның бәрінде қоршау қарастырылған. Сол жерді қоршап берсе дұрыс болар еді», - дейді шаруа.