Бүгін «Майқайыңалтын» АҚ күшімен жер қазу жұмыстарын жүргізу кезінде 70 метр тереңдікте тағы бір құтқарушының мәйіті табылды, деп хабарлайды Halyq Uni.

ТЖМ баспасөз қызметінің мәліметінше, бұдан бұрын шахтаға құлаған 2 құтқарушыны іздеу жұмыстары қайта жанданған болатын.

Сканерлеу және автобустың нақты орналасқан жерін анықтау үшін «Алтыналмас» АҚ мамандары тартылды. Сканерлеу нәтижелері бойынша автобустың 12 метр тереңдікте орналасқаны анықталды. Авариялық-құтқару жұмыстарын жүргізу орнына Павлодар облысы ТЖД құтқарушылары барды. Олар «КӘАҚҚ РОШ» ЖШС-мен бірлесіп мәйітті жер бетіне көтеріп, жедел-тергеу тобына тапсырды, – делінген ТЖМ хабарламасында.

Қайтыс болған адамның туыстарына психологиялық көмек көрсету үшін оқиға орнына ТЖД психологы да барған.

«МАЙҚАЙЫҢ-АЛТЫНДАҒЫ» АПАТ

Айта кетсек, 2024 жылдың 4 қаңтарында «Майқайыңалтын» АҚ шахтасында 4 құтқарушы мінген автобус опырылған топырақтың астына құлады. 2 адамның мәйіті жер бетіне шығарылды, тағы 2 құтқарушыны іздестіру жұмыстары қайта жанданған.

Апатқа ұшырағандардың отбасыларына 4,5 млн теңгеден төленді. 

26 қаңтарда «Майқайың-алтын» АҚ аумағындағы апатты тергеу жөніндегі комиссия жұмысының нәтижесі жарияланды. Соған сәйкес, комиссия 7 жауапты адамды анықтады. 

Олардың әрекеттері салдарынан топтық жазатайым оқиға болды, - делінген Төтенше жағдайлар министрлігі таратқан ақпаратта.

Комиссия 4-24 қаңтар аралығында тергеу жүргізді.

Тергеуге 4 сараптамалық ұйым, оның ішінде Ресей сарапшысын тартып, алтын өндіруші кәсіпорынның куәгерлері мен лауазымды тұлғаларына сауалнама жүргізді. Сонымен қатар комиссия шахтаға түсіп, оқиға орнын зерттеген.

Комиссия жұмысының қорытындысы бойынша апаттың себептері:

• жұмыс өндірісін дұрыс ұйымдастырмау;
• «Майқайыңалтын» АҚ жауапты тұлғалары тарапынан тау-кен жұмыстарының қауіпсіз жүргізілуіне өндірістік бақылау тиісті түрде жүзеге асырылмағаны;
• блоктарды өңдеу кезінде қазбалардан құлау процесін бақылау тиісінше жүзеге асырылмағаны.

Сонымен қатар бұл бос орындарға тиісті бақылау жүргізілмеген. Ал тау массасы кенеттен опырылып түскен.