Өзбекстанның астанасы – Ташкентте бокстан ересектер арасында өткен әлем чемпионатында жеңіске жетіп, алтын жүлде алған Санжар Тәшкенбайға пәтер кілті табыс етілді.

Оған бір бөлмелі пәтерді Beles құрылыс компаниясының директоры Махат Төреәлі табыс етті. Сонымен бірге, ол әлем чемпионы мен оның жеке жаттықтырушысы Нұржан Насановтың астына сәйгүлік мінгізіп, құрмет көрсетті.

Санжардың ата-анасының айтуынша, олар Астанада 20 жылдан бері пәтер жалдап тұрады. Анасы баласының жаңа пәтер алғанын көріп, қуанышы қойнына сыймай жатқанын жеткізді. Боксшының өзі де құрылыс компаниясының басшысына алғыс айтып, жанкүйерлерге қолдау көрсеткендеріне ризашылығын білдірді.

Сіздер бізді қолдауда шаршамасаңыздар, біз де биік шыңдардан көрінуден шаршамаймыз, – деді Санжар Тәшкенбай.

Айта кетсек, боксшы Ташкентте 48 келіге дейінгі салмақта ел намысын қорғап, финалда Грузияның өкілі Сахил Алахвердовиді жеңген болатын.

Бұған дейін Махмұд Сабырханның Шымкенттен екі бөлмелі пәтердің, Асыланбек Шымбергенов пен Дулат Бекбауовтың Тараз қаласынан үш және екі бөлмелі пәтердің кілттерін алғанын жазған болатынбыз.