Алматыда екі автобус соқтығысып, 5 адам жарақат алды, деп хабарлады Halyq Uni тілшісі.

Бүгін сағат 08:30-да Әл-Фараби даңғылында, Жароков көшесінің батысына қарай екі қоғамдық көлік соқтығысты. Жергілікті полиция қызметі кезекші бөлімінің мәліметі бойынша, 31-бағыттағы Yutong қоғамдық көлігінің жүргізушісі даңғылмен батыс бағытта келе жатып, арақашықтықты сақтамау салдарынан аялдамада тұрған 116-бағыттағы SAZ қоғамдық көлігімен соқтығысқан.

Алдын ала мәлімет бойынша, 5 адам дене жарақатын алған, үш адам бас жарақаты, желке аймағының жұмсақ тіндерінің соғылуы диагнозымен Алматы көпсалалы клиникалық ауруханасына, екеуі Орталық қалалық клиникалық ауруханаға жеткізілді.

Жол-көлік оқиғасы дерегін Бостандық аудандық ПБ-ның қызметкерлері өндіріске қабылдады.

Еске сала кетсек, Алматыда бұған дейін де екі автобус соқтығысып, бір адамның қаза тапқанын жазған болатынбыз.