РФ армиясы 70-тен аса зымыран жіберген
Украинаның әуе қорғанысы күштері Ресейдің 60-тан аса ракетасын аспаннан атып түсірді. Бұл туралы «Украинская правда» хабарлады.
Дүйсенбі күні Ресей армиясы украин жеріне қарай 70-тен аса зымыран жіберген. Украин жауынгерлері солардың 60-тан астамын атып құлатқан.
Барлығы 70-ден аса ракета ұшырылды. Алдын ала мәлімет бойынша, Х-101/Х-555 типті 38 қанатты ракета Каспий теңізі ауданы мен Ростов облысының Волгодонск жерінен стратегиялық авиацияның 8 Ту-95мс ұшағы арқылы ұшырылған. Сондай-ақ Қара теңіз флотының кемесінен «Калибр» типті 22 қанатты ракета жөнелтілген.
Бұдан басқа, Қара теңіз акваториясынан Ту-22м3 алысқа ұшатын бомбардировщиктері үш Х-22 қанатты ракетасымен, сондай-ақ Су-35 истребительдері арқылы қолдан басқарылатын алты Х-59 авиациялық ракетасымен және бір Х-31П ракетасымен атқылаған.
Украина Қарулы күштерінің бас штабы оккупанттардың барлығы 60-тан аса ракетасының нысанасына жетпей атып түсірілгенін мәлімдеді.