Жетісу облысына қарасты Көксу ауданында әкесі мен ұлы басшылық қызмет атқарады.

Әлдибек Досымбеков – Жетісу облысы Көксу ауданы мәслихатының хатшысы, ал оның ұлы Ұлан Досымбеков – Көксу ауданы әкімінің орынбасары.

Осыған байланысты Halyq Uni тілшісі Мемлекеттік қызмет істері агенттігінен мұның қаншалықты заңға сай екенін нақтылады.

Ешқандай заңға қайшылық жоқ. Бірі – жергілікті атқарушы орган, екіншісі – өкілетті орган. Сыбайлас жемқорлыққа қарсы заң талаптарына да қайшы келмейді. Себебі екеуі екі бөлек мекемеде жұмыс істейді. Заң бойынша ешқандай шектеу жоқ. Қарама-қайшылық, мүдделер қақтығысы жоқ, – деп жауап берді Мемлекеттік қызмет істері агенттігінің баспасөз қызметі.

Сондай-ақ агенттік сыбайлас жемқорлыққа қатысты қандай да бір нақты ақпарат болса, агенттікке ресми сауал жолдауға болатынын айтты.

Мәслихат – тиісті әкімшілік-аумақтық бөлініс қарамағындағы аймақтың жай-күйіне жауапты жергілікті өкілдік орган.

Әкімдік – тиісті әкімшілік-аумақтық бөлініс қарамағындағы аймақтың жай-күйіне жауапты жергілікті атқарушы орган.