Бір миллионнан астам қазақстандық несие төлеу уақытын кешіктіріп отыр. Бұл туралы Қаржы министрінің бірінші орынбасары Марат Сұлтанғазиев мәлімдеді, деп хабарлайды Halyq Uni тілшісі. 

Несие бюросының ақпаратына сәйкес, бүгінгі таңда 1 миллионнан астам азаматтың несиені өтеу мерзімі бұзылған. Бірқатар қазақстандықтың коммуналдық төлемдер, салық төлемдері бойынша берешегі бар. Сондай-ақ борышкерде мүліктің болмауына байланысты шамамен 4 млрд теңге сомаға қайтарылған атқарушылық құжаттар бар, - деді вице-министр ОҚК брифингінде.

Оның айтуынша, қаржылық жағдайдың нашарлауы экономикалық дағдарыс пен карантин енгізу кезінде жұмысынан немесе еңбекке қабілеттілігінен айрылу, әл-ауқат деңгейінің төмендеуімен байланысты.

Бұған дейін Президент «Қазақстанда миллион адамның табысы ең төменгі күнкөріс деңгейіне де жетпейді. Қарызға батқандар мен кедейлер үлесі артып бара жатыр» деген болатын.