Қорғаныс министрі Руслан Жақсылықов Алматы облысындағы әскери горнизоннан қашып кеткен депутат Дәулет Тұрлыхановтың ұлы Нұрасыл Болатқа қатысты пікір білдірді, деп хабарлады Halyq Uni тілшісі.

Ол (Нұрасыл Болат, – автор) әскери бөлімнің бақылауында болған. Бірақ өз еркімен кетіп қалған. Әскер жасөспірім қылмыскерлерді ұстайтын орын емес. Біздегі функция мүлде басқа. Бұл – тәрбиеден кеткен олқылық. Түсінесіз бе? Бұл туралы мен айтқанмын, - деді Руслан Жақсылықов Үкімет отырысынан соң.

Бұған дейін Қорғаныс министрлігі Дәулет Тұрлыхановтың ұлы әскери бөлімнен қашып кеткенін растаған еді. Сондай-ақ кеше Нұрасыл Болаттың қайда жүргені анықталған болатын.

Айта кетейік, оқиға биыл 11 ақпанға қараған түні Алматыда басталған. Ерлі-зайыпты заңгерлер Олег Чернов пен Анна Димитриевичті ер адам ұрып-соққан. Бұл дерек бойынша қылмыстық іс қозғалды. Содан кейін оларды ұрған адамның Мәжіліс депутаты Дәулет Тұрлыхановтың ұлы Нұрасыл Болат екені анықталған болатын.