Тараз қаласы полиция басқармасының қызметкерлері жедел-іздестіру жұмыстарын жүргізу барысында қала аумағындағы қараусыз қалған ғимараттардың бірінен жасырылған атыс қаруларды тапты.

Арнайы жүргізіліп жатқан іс-шаралар барысында Калашников маркалы бір автомат, Streamer маркалы бір травматикалық тапанша, бір оқжатар мен бір жарық-шулы граната тәркіленді. Анықталған қару-жараққа қатысты сот-баллистикалық сараптама тағайындалды, – деді Тараз қалалық полиция басқармасының бастығы Асылхан Заурбеков.

Тәртіп сақшылары қарудың, оқ-дәрілердің, арнайы құралдардың орны туралы хабарлаған немесе оларды полицияға өз еркімен тапсырған адам қылмыстық және әкімшілік жауапқа тартылмайтынын еске салады. Анонимділікке кепілдік беріледі.

Бұған дейін Жамбыл облысында қару-жарақ қоймасы табылған болатын. Кейін өңірде сегіз автомат анықталған еді.