Қазақстанда 2,8 млн гектар аумақта шегірткеге қарсы өңдеу бойынша қорғау іс-шаралары аяқталды. Бұл болжанған көлемнің 110%-ын құрайды, деп хабарлайды Halyq Uni.

Барлығы 15,8 млн гектар зерттелді, бұл жоспардың 92,4% құрайды. 13 облыста — Абай, Алматы, Атырау, Шығыс Қазақстан, Жамбыл, Жетісу облысы, Батыс Қазақстан, Қарағанды, Қызылорда, Павлодар, Солтүстік Қазақстан, Ұлытау және Түркістанда жұмыс толығымен аяқталды. Ақмола, Ақтөбе және Қостанай облыстарында италиялық шегіртке түрәне қарсы өңдеу жұмыстары жалғасып жатыр, деп мәлімдеді Үкімет.

Вице-премьер Серік Жұманғариннің төрағалығымен өткен шегірткенің таралуына қарсы іс-қимыл жөніндегі орталық штабтың кезекті отырысында зиянкестермен күрес жөніндегі жағдай қаралды. Ауыл шаруашылығы вице-министрі Ермек Кенжеханұлы шекара маңындағы аумақтарға ерекше көңіл бөлінетінін атап өтті.

18-20 шілдеде Орынбор облысынан Ақтөбе облысының Әйтеке би ауданына италиялық прус ұшып келгені тіркелді. Біз жедел түрде өңдеу жүргіздік, қазір шекара маңындағы аумақты бірлесіп зерттеу үшін Ресей тарапымен келіссөздер жүргізіп жатырмыз», — деп мәлімдеді ол.

Шегірткеге қарсы күрес жүргізу үшін Ақтөбе облысына 136 мың гектар аумақты өңдеуге арналған препараттардың резервтік көлемі ұсынылды. 400 мың гектарға дәрі-дәрмек сатып алынды, оның жартысы Қостанай облысына берілді.

Ақтөбе облысына сапары кезінде вице-премьер Серік Жұманғаринге кейбір фермерлік шаруашылықтар егістігін қорғау үшін Ресей аумағының бір бөлігін 100 метр тереңдікте өңдегені туралы хабарланды. Осы аптада вице-премьер Ресей Федерациясы Үкіметі төрағасының орынбасарымен жерді бірлесіп, жедел өңдеу мәселесін талқылайды.

Ауыл шаруашылығы министрлігі Ақтөбе, Ақмола және Қостанай облыстарының әкімдіктерімен бірлесіп шегірткенің таралу ошақтарын анықтаған кезде жедел шаралар қабылдауды жалғастырады. 

Бұған дейін де еліміздің шегірткемен күрес қалай жүріп жатқаны жайлы жазған едік. Сонымен қатар сарапшы, «Шопан ата» ұлттық агроқозғалысы» РҚБ төрағасы Алмасбек Садырбаев елімізде шегірткемен күреске бөлінген қаржы тиімсіз жұмсалып жатқанын айтқан болатын. Оның пікірінше, Қазақстанда шегірткемен күрес шаралары сонау кеңес заманынан қалған шешімдермен жүргізіледі.

Себебі, заманауи технологиялар жоқ, ғалымдармен бірігіп, ғылыми негіздемелердің, жұмыстардың жасалмауынан болып отыр. Әлемдік үрдіс зерттелмейді. Шегірткемен күресетін қазіргі заманауи технологиялар – бұл дрондар, соның ішінде агрокоптерлер. Сол бізде жоқ. Бізде уды трактор, машинамен жүріп, шлангамен шашады», - деді қоғамдық бірлестік төрағасы.

Былтыр Қостанай облысында 16 мың гектар жайылымдық жерге шегіртке тарап кеткен болатын. Сондай-ақ Ақтөбе мен Абай облыстарында зиянкестердің таралғаны белгілі болды.