Автокөлік батпақты жерде орнынан қозғала алмай тұрып қалған
Атырау облысында жолға автокөлікпен шығып, адасып кеткен адамдар құтқарылды.
Төтенше жағдайлар министрлігінің хабаралуынша, автокөлік 12 ақпанда сағат 00:10-да Атырау облысы Құрманғазы ауылынан шамамен 65 шақырым қашықтықта батпақты жерде орнынан қозғала алмай тұрып қалған.
Құтқарушылардың үйлесімді әрекетінің нәтижесінде көлікте отырған 3 адам жақын маңдағы шаруа қожалығына эвакуацияланды.
Жұмыстарға Құрманғазы ауданының №7 ӨСБ 4 қызметкері мен 1 техникасы жұмылдырылды.
Еске сала кетсек, облыстық ТЖД баспасөз қызметі кеше Исатай ауданы қыстауларының бірінен Тұщықұдық ауылына қарай бет алған 3 көліктің де батпақты жерде қалып, орнынан шыға алмағанын хабарлаған еді. Құтқарушылар жоғалған адамдарды Тұщықұдық ауылынан 20 шақырым жерден тапқан. Олар 15 адамды, оның ішінде 8 баланы құтқарып, Тұщықұдық ауылына жеткізген.