Атырау облысында батпақта қалған 15 адам құтқарылды
Оларға медициналық көмек қажет болған жоқ
![](https://halyq-uni.kz/cache/imagine/1200/uploads/news/2024/02/12/65c9c8875b806732567339.png)
Атырау облысында 15 адам құтқарылды, деп хабарлады Halyq Uni тілшісі.
Облыстық ТЖД баспасөз қызметінің мәліметінше, кеше Атырау облысы Исатай ауданы қыстауларының бірінен Тұщықұдық ауылына қарай бет алған 3 көлік батпақты жерде қалып, өздігінен шыға алмаған. Ведомство бөлімшесіне қоңырау сағат 23:10-да түскен.
Құтқарушылар жедел түрде апаттық-құтқару жұмыстарын жүргізуге бет алды. Олардың үйлесімді жұмысының нәтижесінде жоғалған адамдар Тұщықұдық ауылынан 20 шақырым жерден табылды.
Құтқарушылар 15 адамды, оның ішінде 8 баланы құтқарып, Тұщықұдық ауылына эвакуациялады. Құтқарылған адамдарға медициналық көмек қажет болған жоқ.
Апаттық-құтқару жұмыстарына Исатай ауданының №6 ӨСБ және жергілікті атқарушы органдардың қызметкерлері қатысты.