Елімізде тұрақсыз ауа райы сақталады
Ақтөбе облысында ауа райының қолайсыздығы салдарынан жолда қалған жолаушыларға көмек көрсетілді, деп хабарлады QazAvtoJol ұлттық компаниясы.
Бұрқасын, қалың қар мен жолдың көрінбеуінен республикалық маңызы бар М-32 (Самара (Ресей) – Шымкент) автожолында уақытша шектеу енгізілді. Жолда қалған 6 автобустың жолаушыларына компания қызметкерлері мен еріктілер ыстық тамақ пен сусындар, дәрі-дәрмектер жеткізді.
Сондай-ақ жолда қалып қойған жеңіл және жүк көліктерді қардан шығару, жүргізушілерді жақын маңдағы елді мекендерге жеткізу жұмыстары да қарқынды жүргізіліп жатыр.
3 күннің ішінде 60-тан аса автокөлік қар құрсауынан шығарылып, Хромтаудан Ақтөбе қаласына дейін жеткізу ұйымдастырылды.
Еліміздің бірқатар өңірінде ауа райы әлі тұрақсыз. Жол қызметкерлері тәулік бойы, күшейтілген режимде жұмыс істеп жатыр.