Өзбекстанда заңсыз ұсталған қазақстандық туристердің оқиғасын Сыртқы істер министрлігі бақылауда ұстап отыр. Бұл туралы министрліктің ресми өкілі Айбек Смадияров Үкіметте тілшілерге берген сұқбатында айтты.

Қазақстанның Сыртқы істер министрлігі оқиғаның мән-жайын анықтау үшін хат жолдады. Біз өз азаматтарымыздың құқығын қорғаймыз, – деді Айбек Смадияров.

Оның айтуынша, ведомство видеоны арнайы қарап шығып, оқиғаның мән-жайымен толық танысты.

Әлеуметтік желілерде тараған Өзбекстан полицейлері біздің азаматтарға электрошокер қолданған видеоны көрсеңіздер, комментарийде өзбек халқының өзі құқық қорғау органдарының әрекетін айыптап жатыр. Дегенмен, біз жағдайды бақылауда ұстап отырмыз. Ол жақта ішкі тергеу басталды, полицейлер қызметінен шеттетілді. Біз бұған араласпауға тырысамыз және азаматтарымызды қорғау мәселесіне қатысты тұсын ғана қадағалаймыз, – деп мәлімдеді Айбек Смадияров.

Еске сала кетсек, бұған дейін Өзбекстанның тәртіп сақшылары қазақстандық туристерді электрошокермен қинағаны туралы хабарладық.