Жамбыл облысында да сұмдық жағдай. Шу ауданының 30 жастағы тұрғыны тоғыз жастағы екі жеткіншекті ұзақ уақыттан бері зорлап келген. Үшінші сынып оқушыларына азғындық жасады деген күдікті ұсталып, қамауға алынды. Бұл туралы «КТК» телеарнасының сюжетінде айтылды. 

Таратылған мәліметтерге сүйенсек, 43 жастағы жергілікті тұрғын баласы мен оның досының жыныстық сипатта зорлыққа ұшырағанын айтып, полицияға шағым түсірген. Арызда екі балаға ауылдағы қараусыз тұрған ғимараттардың бірінде қиянат жасалғаны айтылған. 

«Полиция қызметкерлерімен жедел іздестіру шараларын жүргізгенде, Шу ауданының 30 жастағы тұрғыны ұсталды. Аталған дерек бойынша ҚР ҚК 12-бабының 4-бөлігімен сотқа дейінгі тергеп-тексеру басталды. Күдіктіге қатысты Шу ауданының сотымен қамауға алу бұлтартпау шарасы қолданылды. Барлық сараптама тағайындалды», - деді Жамбыл облысы полиция департаментінің баспасөз хатшысы Гүлсара Мұхтарқұлова. 

Бейресми ақпараттарға сенсек, сорақылық оқушының бірінің денсаулығы күрт нашарлап, дәрігерге қаралғанда анықталған. Тоқ ішегіне қатты зақым келген. Оқушы азғынның құрбанына айналғанын айтуға қорыққан. Педофил болған жағдайды біреу-міреу естісе, «өздеріңді де, ата-аналарыңды да, өлтіремін» деп сес көрсеткен.

Жеткіншектер бір жыл бойы іштен тынып жүрген. Ел арасында, күдіктінің ауыл имамының көмекшісі екені айтылуда. Бірақ облыстың бас имамы бұл деректі теріске шығарып, қол астында ондай қызметкердің мүлдем болмағанын жеткізді.

Тағы оқи отырыңыз: Алматыда бастауыш сынып оқушысын жоғары сынып оқушылары бірнеше рет зорлаған