Солтүстік Қазақстан облысында үш мектеп апатты жағдайда тұр. Былтырдан бері 3,2 млрд теңгеге апатты мектептердің орнына 2 жаңа мектеп салу жұмыстары жүргізіліп жатыр. Бұл туралы облыстың білім басқармасы Halyq Uni ресми сауалына берген жауабында мәлімдеді.

Сондай-ақ облыстағы мектептерде 3 673 балаға орын жетпейді. Оның басым бөлігі Петропавл қаласында – 3 268 орын.

Әкімдіктің хабарлауынша, 2023-2025 жылдарға арналған «Жайлы мектеп» пилоттық жобасы аясында Петропавл қаласында 2 700 оқушыға арналған 4 мектептің құрылысы жоспарланған.

СҚО-дағы мектептерде 330 маманның орны бос тұр. Ауылдарда орналасқан мектептерде 205 маманға сұраныс бар.

Облыс бойынша бос вакансиялар:

• математика  – 95;
• мектепке дейінгі тәрбиешілер – 47;
• орыс тілі мен әдебиет – 44;
• педагог-психолог – 38;
• ағылшын тілі – 37;
• бастауыш сынып мұғалімі – 34;
• әлеуметтік педагог – 29;
• физика – 28;
• информатика – 20;
• дефектолог – 16;
• қазақ тілі мен әдебиет – 16;
• алғашқы әскері және технологиялық дайындық – 15;
• тарих – 15;
• химия – 13.

Білім басқармасы биыл облыстағы университетті педагогикалық мамандық бойынша – 808, М. Жұмабаев атындағы жоғары колледжді 239 түлек бітіргенін хабарлады. Солардың есебінен бос вакансияны жабуды жоспарлап отыр.

Айта кетейік, Алматы қаласындағы мектептерде 619 маманның орны бос тұр.