ҚМА Алматы қаласы бойынша департаменті қалалық авиациялық көлік прокуратурасының үйлестіруімен ірі көлемдегі есірткі заттарының заңсыз айналымының жолын кесті, деп хабарлады Halyq Uni тілшісі.

Агенттіктің мәліметінше, қызметтік-іздестіру итінің көмегімен жүргізілген жедел-іздестіру іс-шаралары барысында АҚШ-тан пошта арқылы жөнелтілген затты алған Алматы қаласының тұрғыны жалпы салмағы 866 грамм болатын «марихуана» есірткісімен ұсталды. Ұсталған азаматтың пәтерін тінту кезінде есірткі заттары, 5 дана электронды таразы, сондай-ақ есірткі заттарын қолдануға және орауға арналған құрылғылар тәркіленді.

Ұсталған азаматтың Telegram мессенджері арқылы есірткі сатумен айналысқаны анықталды.

Қазір тергеу жүріп жатыр. Бірқатар сараптама тағайындалды. Күдіктіге қатысты «Қамау» түріндегі бұлтартпау шарасы таңдалды.