Алматыда вайнер Мейіржан Төребаев және Мейірхан Шерниязовқа, сондай-ақ тағы 10 айыпталушыға қатысты қылмыстық іс бойынша алдын ала тыңдау аяқталды, деп хабарлады Halyq Uni.

Алмалы аудандық сотының судьясы Кәмшат Саурова Мейіржан Төребаевтың қамауда ұстау түріндегі бұлтартпау шарасын үйқамаққа ауыстыру туралы өтінішін қабылдады.

Бұған дейін мемлекеттік айыптаушы Ерлан Құланбаев Мейіржан Төребаевтың адвокаты Мұратовтың сотталушыға қатысты қамауда ұстау түріндегі бұлтартпау шарасын өзгерту туралы өтінішіне қарсылығы жоқ екенін мәлімдеді.

Мейіржан Төребаевқа сот процесіне келуді және медициналық көмекке жүгінуді қоспағанда, тұрғын үйден шығуға тыйым салу түрінде шектеулер белгіленді. Сондай-ақ ол телефон арқылы келіссөздер жүргізе алмайды, журналистерге ойын айтуға да тыйым салыған.

Қылмыстық кодекстің 217-бабының үшінші бөлігі бойынша қылмыстық істі Алматы полиция департаменті «Astex.kz»,  «ACD technology» ЖШС лауазымды тұлғаларына қатысты азаматтар тобының ұжымдық өтініші бойынша тіркеді.

2019 жылдың ақпанынан 2021 жылдың қаңтарына дейінгі уақыт кезеңде аталған ЖШС-ның лауазымды адамдары жеке және заңды тұлғалармен мемлекеттік сатып алуға қатысу үшін қажетті қаржы тарту үшін шарт жасасқан.

Екіжақты құжатқа сәйкес, фирмалар әр салымшыға ай сайын енгізілген салым сомасының 20 пайызын төлеуі керек болған. «Astex.kz» ЖШС-ға 5 млрд теңгеден астам мөлшердегі ақшалай қаражат 162 салымшыдан басқа компания – «Mudarabah capital» ЖШС арқылы түскен.

MUDARABAH CAPITAL ІСІ

2022 жылдың ақпанында Алматыда Mudarabah capital компаниясына қатысы бар деген күдікпен ұсталған бірнеше адамға қаржы пирамидасын құру және оған басшылық ету бойынша айып тағылды. Олардың ішінде вайнерлер Мейіржан Төребаев пен Мейірхан Шерниязов қамауға алынып, тағы бір вайнер Азимжан Саидбаев шетелге қашып кеткен.

Қылмыстық іске байланысты сотқа дейінгі тергеп-тексеру органдары Алмас Құрманғалиевке ҚР ҚК 217-бабының 3-бөлігі 1 және 2-тармағы («Қаржылық (инвестициялық) пирамиданы құру және оған басшылық ету») және 262-бабының 1-бөлігінде («Ұйымдасқан топ, қылмыстық ұйым құру және оларға басшылық ету, сол сияқты оларға қатысу») көрсетілген қылмысты жасады деген күдікке ілінгенін анықтады.

Ержан Мансұров, Ерлан Мансұров, Дания Рахимова, Руслан Бұрқанов, Мейіржан Төребаев, Мейірхан Шерниязов, Тимур Рүстемов, Нұрлан Сұлтанбаев, Самат Қасенов, Андрей Ча, Біржан Жармұхамед Қылмыстық кодекстің 217-бабының 3-бөлігі 1 және 2 тармағында және 262-бабы 2-бөлігінде көрсетілген қылмысты жасады деген күдікке ілінген.

2022 жылдың 13 желтоқсанында сотталушы Мейіржан Төребаевтан қылмыстық істі прокурорға қайтару туралы мәселесін шешу үшін алдын ала тыңдау тағайындау туралы өтініш түскен.