«Анасы некелесуге рұқсатын берген»: Ересек адамнан жүкті болып қалған оқушы қызға қатысты тың дерек айтылды

Түркістан облысы бала құқығын қорғау бойынша уәкілетті өкілі әрі облыс әкімінің бала құқығын қорғау бойынша штаттан тыс кеңесшісі Гүлжан Вероцкая жақында өңірде болған жантүршігерлік жағдай туралы баяндады.

Түркістан облысында кәмелет жасқа толмаған қыз ересек ер адамнан жүкті болып қалған. Гүлжан Вероцкая қыздың тұратын ауданын, жасын, жүктілік мерзімін жариялаған жоқ. Өйткені, оқушы қызға қатысты ақпарат Бала құқығы туралы конвенцияның 16-бабына сәйкес құпия сақталуға тиіс.

«Бұл жағдайды анықтаған - қыздың сынып жетекшісі. Сынып жетекшісіне шексіз алғыс айтамын. Әрбір мектеп қызметкері бала құқығы бұзылып жатқанда Әкімшілік құқық бұзушылық туралы кодекстің 127-бабының 1-тармағына сәйкес, дер кезінде құзырлы органдарға хабарлауы керек», - деп жазды ол.

Облыс әкімінің бала құқығын қорғау бойынша кеңесшісі бұл жағдайдың қалай болғанын егжей-тегжейлі айтып берді. Айтуынша, оқушының анасы ер адамның үйінде тұру үшін қызымен некелесуге рұқсатын берген.

Бұл еш ақылға сыймайтын қатыгездік және қылмыс! Қазақстанда кәмелет жасына толмағандармен некелесу – қылмыс. Осы ретте ата-аналарға ескерту жасаймын. Кәмелет жасына толмаған баланы некелестіру құқығы жоқ. Мұндай жағдайға жол бергендер Қылмыстық кодекстің 140-бабы бойынша сотталады, - деп ескертті Гүлжан Вероцкая.

Түркістан облысы бала құқығын қорғау бойынша өкіл мұндай жағдайда мектеп басшылығына қатаң сөгіс жариялап, жұмыстан босату сияқты шаралармен ғана шектелу аздық ететінін ескертті.

• бұл отбасының басында баспанасы болмаған және ешқандай әлеуметтік көмек алмаған;
• денсаулық сақтау ұйымының мүлдем хабары жоқ, демек отбасымен байланысы жоқ, алайда әр жиналыста «Патронаждық медбике» жүйесін енгізіп жатқандары туралы айтылып келеді;
• қыздың өзі ешкімге бөлісіп айтпаған, демек мектептегі ақпараттандыру жұмыстарын қолға алу керек. Әрбір бала құқығы қорғалатыны туралы нық сенімді болуы керек;
• құқық қорғау органдары қылмыскерді қамауға алғандығы туралы ақпарат берген, бірақ нақты күні көрсетілмеген. Негізі, зорлық-зомбылық фактісі анықталған сәттен бастап жәбірленушіні зорлаушыдан қорғау қажет;

Гүлжан Вероцкая журналистерді, әлеуметтік желі қолданушыларын балаларға қатысты кез келген ақпаратты таратқанда барынша сақ болуға шақырды.

«Бұл оқиға менің бақылауымда, мемлекеттік органдармен, қыздың өзімен және онымен жұмыс істейтін психологтар, медициналық қызметкерлермен тығыз байланыстамын. Қылмыскер мен қыздың анасы заң аясында толыққанды жауып беруін қадағалаймын. Тергеу біткен соң, сот шешімі шыққан соң, нәтижесін бөлісемін», – деп жазды ол.