Мемлекет басшысы Денсаулық сақтау министрі Ажар Ғиниятты қабылдады.

Қасым-Жомарт Тоқаевқа еліміздегі эпидемиологиялық ахуал туралы баяндалды. Министрдің айтуынша, қаңтардың ортасында коронавирус жұқтырғандар саны тәулігіне 16 500 адам болса, бүгінде шамамен 1 500 адам тіркелген. Жалпы еліміздегі эпидемиологиялық ахуал тұрақты. Қазір стационарлардың 20 пайызында ғана науқастар ем алып жатыр. Сондай-ақ Ажар Ғиният көптеген шектеу шарасының алынғанын, оқушылардың дәстүрлі оқыту жүйесіне, кәсіпорындардағы жұмысшылардың офлайн жұмыс істеуіне рұқсат берілгенін атап өтті. Ведомство басшысы ревакциналау жұмыстарына ерекше көңіл бөлініп отырғанын жеткізді.

Ғиният Президентке денсаулық сақтау саласын жетілдіру жөніндегі жоспарын таныстырды. Оның айтуынша, министрліктің жұмыс жоспары ең алдымен алғашқы медициналық көмекті жетілдіруге, ауыл-аймақтардағы денсаулық сақтау жүйесінің сапасын арттыруға бағытталған. Сонымен қатар биыл Балалар жылы болып жарияланғандықтан, балалардың денсаулығына көп көңіл бөлінеді. Атап айтқанда мектептегі медицинаның жаңа тәртібі мен стандарты қабылданады.

Тоқаев министрліктің жұмыс бағытын қолдайтынын айтып, денсаулық сақтау саласын одан әрі дамыту жөніндегі жұмыстарды жалғастыруды тапсырды.